Door: Herman Hermsen, ière-veurzitter S.V.B.
Op dónderdaag 5 mei 2016 is ózze ald ièrste elftal speuler Sef Titulaer, in de gezaegende laeftièd van 97 jaor, euverleeje. Sef waas tot veur kort d’n aldste in laeve ziende speuler van ós veuroorlogse generatie voetballers.

De  rouwadvertentie in de krant det Sef waas gestorve, haet veural beej vuuël aldere SVB’ers, die um good gekind hebbe, herineringen opgerope aan vervlaoge vruùger jaore. In die vièrtiger jaore umzuimde beej  thoèswedstriède van ós ièrste elftal waal mièrdere doèzende toeschouwers ’t speulveld aan de St.Annawaeg.

Minse kóste nog te voot vanoèt ’t dörp euver ’t spaor en ware zoeë drek beej SVB. In de oorlogsjaore bezoot SVB ein ièzersterk ièrste elftal, det eine geweldig naam had, neet allein kwa prestaties, aevel ouk in opzich van sportiviteit. Nao de fusie van de Katholieke en Neutrale Bónd speulde SVB in de hoeëgste klasse van K.N.V.B. Det elftal wis in ’t seizoen 1942-1943 van VVV, det in dezelfde klasse speulde, mit 2-1 te winne aan de Kraal ónder ’t beejzeen van maar leefs 7200 toeschouwers. SVB kwaam dansende de Kaldenkerkerberg aaf um thoès in Blièrick te gaon feeste.

Sef Titulaer vormde dao as back, same mit Hans Nijland en kieper Lambert v/d Brand eine hièle belangrièke schakel in det elftal. Nao zien voetballoupbaan is Sef Titulaer gaon fluite en greujde hae oèt tot eine bekwaome, jao wièd bekinde scheidsrechter.

Sef waas geroemp um zien groeëte verdeenste veur ’t scheidsrechterswaeze en in ’t bièzónder veur de plaatselikke SVO wao hae 64 jaor trouw lid van is gewaes. Wie Sef nog in gooje doon waar, kwaam hae idder jaor trouw nao de kóffietaofel en jaorvergadering van Ald-SVB, wao hae same zien kammeräöj van waalièr nog ens kós naogenete van daen schoeëne alden tièd.

Det is noow allemaol veurbeej en veur good verleejen tièd, wao minnigein in dees daag toch nog döks mit heimweh aan truuk zal dinke. Sef woeënde al geruume tièd in ein appartement van verzörgingstehoès Sinselhaof in Venlo-Zuud. Heej haet Sef nog lang kinne genete van ziene alden daag, ofschoeën de letste tièd zien gezichsvermeuge um danig in de steek leet. Sef ging altièd waalgemood door ’t laeve, makde gaer ein grepke en genoot gaer van ein lekker glaeske beer. Hae waar geleef door en beej idderein!!

Sef stoeëtde altièd hièl veurzichtig op de korf as hae zien meinig nao veure brach.Noeëts ein ónvertaoge waord, det zoel Sef neet euver zien hert kinne kriège. Op dónderdaag 12 mei hebbe weej allemaol in ’t crematorium te Blièrick van Sef aafschièd genaome. Prachtige plaetjes passeerde de  revue en schilderde zoeë ’t rièke lange laeve van Sef temidde van zien gezin, kleinkinder en achterkleinkinder. Milou vertelde wie zièr het van ziene Opa had gehalde en noow hae d’r neet mièr is, veur altièd in zien hertje zoel bliève meidrage. Ein aandoonlik tafrièlke, pienter veurgedrage names alle klein- en achterkleinkinder .

Sef Titulaer is d’r neet mièr! ’n Werme persoeënlikheid en hièle fijne sportkammeraod haet ós verlaote! Ein groeët dankewaal zal um begeleie nao zien letste rösplaats.

Adieu beste Sef, hojje leve mins!

Weej laeve mei mit ut verdreet van zien kinder, kleinkinder en achterkleinkinder, as ouk van de vaerdere femilie, vrinde en bekinde. Hièl vuuël sterkte toegewins en weej haope van herte det ut groeëte gemis van Pap en Opa, gauw zal waere euverstump door de dankbare herinnering aan ziene veurbeeldige lange laeveswandel.